Այցելիր Արտավան

artavan

🌳🌿Վայոց Ձորի Արտավան գողտրիկ անկյունն իր ուրույն տեղն է գրավում Հայաստանի էկոտուրիզմի քարտեզի վրա` «Կենսաբանների հայկական միություն» ՀԿ-ի ջանքերով։

Հարուստ կենսաբազմազանությամբ աչքի ընկնող այս վայրը կգրավի բնությանն առավել մոտ գտնվելու հանգիստ փնտրողներին։

🏞️Քայրաշավները հնարավորություն կտան բացահայտելու Արտավանի ողջ հմայքը և վայելելու շրջակայքն իր ողջ գեղեցկությամբ և պարզությամբ։ Արահետների ցուցանակներին այստեղ փոխարինելու են եկել վիրտուալ (VR) եւ լրացված իրականությամբ (AR) հագեցած պիտակները, որոնք թույլ կտան կողմնորոշվել տեղանքում, ծանոթանալ կենսաբազմազանությանը։ Քայլուղիներից մեկը կհասցնի ձեզ բնական 🌊 «Հայելի» լիճ, որը կարծես երկիր մոլորակն է արտացոլում իր պաղ և զուլալ ջրերում։

Արտավանն առաջարկում է նաև ⛺ վրանային հանգիստ, 🐎 ձիերով զբոսանքներ, 🏠 գիշերակացի հնարավորություն տեղաբնակների կողմից խնամքով ստեղծված հյուրատներում և, իհարկե, համեղ տնական սնունդ` սիրով աճեցված և պատրաստված հենց արտավանցիների ձեռքերով։ Եթե երկար քայլելը ձեր սրտով չէ, կարող եք օգտվել 🚙 ամենագնաց մեքենաներով շրջագայելու հնարավորությունից։

Բայց սա դեռ ամենը չէ։ Արտավանը, Վայոց ձորն ընդհանրապես, առավել գրավիչ է, քանի որ վայրի կենդանիներին այստեղ հնարավոր է տեսնել իրենց իսկ միջավայրում։ Այստեղ 🐾 գորշ արջերը կարծես հարմարվել են մարդկանց հետ համակեցությանը և հաճախ օգտվում են այգու բարիքներից` հատապտուղներ, մրգեր, ընկուզեղեն։

Բնապահպանական մի շարք կառույցների աջակցությամբ ստեղծված 🏡 հատուկ տնակներն Արտավանից ոչ շատ հեռու Չիվա և Շատին գյուղերում թույլ են տալիս տեսնելու արջերին բնական միջավայրում։ Պարզապես պետք է զինվել համբերությամբ, 📷 ֆոտոխցիկով լավագույն պահերը որսալու համար։ 🔭 Ինչպես նաև հատուկ ընտրված դիտակետերում հնարավորություն ունեք տեսնելու Կարմիր գրքում հաշվառված 🦌 բեզոարյան այծերին ազատության մեջ։

ℹ️ Ի դեպ, Բնության համաշխարհային հիմնադրամի աջակցությամբ հիմնադրված Վայոց ձորի Արփա (նախկին՝ Գնիշիկ) պահպանվող լանդշաֆտին կից ստեղծված տեղեկատվական կենտրոնն այցելուներին տրամադրում է համապարփակ տեղեկություն Վայոց Ձորի յուրահատկությունների, հանգստյան տարբերակների, կենսաբազմազանության մասին։ Կենտրոնն ունի գեղեցիկ տեսարանով գիշերակացի հարմարավետ տնակներ` Վայոց Ձորում կարճատև կանգառ փնտրող ճամփորդների համար։

«Այցելի՛ր Արտավան» էկոտուրիզմի զարգացման նախաձեռնություն` artavan.am
Arpa Protected Landscape
Կենսաբանների հայկական միություն / Armenian Society of Biologists

ՀՀ Զբոսաշրջության կոմիտե

Նմանատիպ գրառումներ